من خمس سنين و 3 شهور و شوية كان عندي امتحان محاسبة وكان اخر امتحان في الفصل لساتني فاكره لهالتاريخ ... طبعا اكيد لانه الامتحان كان صعب والعواقب تبعته كانت و خيمة ولانه كان اخر امتحان سحبنا حالنا و رحنا عالبحر لنكب قرفنا هناك و لكن بدت اثار الامتحان تسيطر و تقرير عن الامتحان وصل اهلي ... تلفون من البيت الامتحان صعب و اثاره وصلت رفح تعال روح قبل ما يصير اشي الوضع بطمنش ... امتحانا كان صعب و اصعب من انه كان كم من سؤال في ورقة ...
في نفس الوقت اللي كنا بنحل فيه الامتحان كانت ناس بتحط في امتحان بس هالمرة امتحان مش لتخصص ولا لجامعه ... امتحان لسكان القطاع كله ...
امتحان في الصبر ... امتحان راح فيه اكتر من الف شهيد ... امتحان تحاصر من وراه مليون ونص امتحان ماتوا فيه مرضى ما وصلهم دواهم او ما قدروا يطلعه لبرا البلد امتحان دفع ثمنه طلبه ما قدره يرجعه لجمعاتهم برا امتحان خلانا نصدق باختراع اسمه الة الزمن .. رجعنا بالزمن 50 سنه لورا قدنا الحطب و شغلنا البوابير ونقلنا الميا بالسطل ... امتحان اتحملنا فيه 22 ليلة سودا .. 22 يوم من الدمار و الخوف و الرعب ... امتحان عشانه صار و صار و صار ... كل ما بنحل سؤال من اسئلته بنلقى سؤال اصعب .. كل ما كنا نعتقد انا وصلنا نهايته بنلقى انه لسا في كمان اسئلة ....
معلش يا محاسبة امتحانك كان سهل كتير وتعبنا فيكي لقيناه ...و يا ترى هالامتحان هاد رح يكفي اللي قدمناه عشانه ... بكفي يا امتحان خلص بس .. بكفي بدنا نشوف نتيجة اللي قدمناه ..بس ان شاء الله تكون نتايجه مستاهلة
بجد بكفي
طبعا لساتني بكتب لحالي ^_^
طبعا لساتني بكتب لحالي ^_^
