25-12-2009

مجرد عابر سبيل ...

بدي سيارة هدية ^_^

مش طالب اشي مستحيل يعني !

بعد حوار طويل الامد بيني وبين الستيرن والبريكات والكلاتشات و القيورة .... كان عندي تست اليوم للرخصة .... والحمد لله تمت العملية بنجاح ^_^

هيا كيف تمت ... ادقوش كتير ... المهم اني خلصت من اشي اسمه رخصة وهلقيت بستنا حدا يهديني سيااارة ^_^

اكتر اشي محزن في الموضوع ... اني فقدت مصدر تسلايتي الاول , وهلقيت بدنا ندورلنا علي مصدر تاني نتسلا فيه ...
 

و ويييييييييييييييييييييييييييييييييييييييييييو .... تو تو تووووووووووووووووووووووووووت

محتاجين دعانا

سلام الله عليكم ورحمته وبركاته ....

اليوم ان شاء الله ... او بالتحديد هلقيت بدت امتحانات توجيهي ...

والاشي الوحيد اللي بنملكه نقف جنبهم بالدعاء ....

ربنا يوفقهم و يذكرهم اللي نسوه ويجعل كل صعب سهل يا رب ...


دعواااااااااااااتكم من هلقيت ل 1 / 7 الساعة 12

شـــ , ــتــــ , ـــــا ت

لا أدري لما أنا هنا اليوم , ربما إشتقت لكلماتي فعدت لأخُطها كي أراها أمامي ... عَلي أجد فيها مخرجا من ما أنا فيه
بحثت بين كتاباتي القديمة , وبحثت بين مذكراتي , ربما قلبتها ورقة ورقة , استرجعت شريط ذكرياتي فربما أجد فيه شيئا عجزت عن تدوينه من قبل فاحتفظت به لذاكرتي ...

بحثت طويلا في ماضيَّ ... بل ربما تخطيت ذلك لأبحث في مستقبلي علي أجد ما يدل على حاضري ...

شتـــات ... من أيام ليست بالبعيدة , مرت علينا الذكري الواحد والستون للنكبة , يوم شرد أهلنا وأصبحوا

أنت لي ...

أنت لي ...

اليوم وفي تمام الساعة الثامنة وثلاث وأربعون دقيقة صباحا, أتممت قراءة رواية :: أنت لي :: والتي بدأت في قراءتها قبل ما يقارب الأربع شهور.

عن الرواية :

أنت لي هي رواية للدكتور منى المرشود وهي سعودية الجنسية تعمل كطبيبة أطفال في المملكة , تتألف روايتها من واحد وخمسين حلقة كتبتها في ما يقارب السبع سنوات ونشرت طبعتها الأولي قبل ما يزيد عن عام وتحديدا في الرابع والعشرين من شهر ديسمبر من عام 2007.

طريقي إلى الرواية :

لم أقرا من قبل رواية كبيرة بهذا الشكل :: للعلم فالرواية تفوق صفحاتها الألف , وسأتكلم عنها لاحقا :: ... اعتدت أن اقرأ الروايات القصيرة :: روايات الجيب :: فقرأت منها للدكتور نبيل فاروق وخصوصا روايات الرجل المستحيل وقرأت سفاري و بعض الروايات القصيرة الأخرى.

وذات مرة ومع تشجيع من الغير ^_^ على قراءة :: أنت لي :: لما وجدوه من تشويق وإثارة وروعة قررت أن أبدأ في قراءتها , وكان ذلك حسب ما اذكر في العشرينات من شهر ديسمبر 2008 ... ومع بدء الحرب على غزة

متفرقات

سلام الله عليكم ...

في الكم يوم اللي فاتوا كان في كتير حاجات صارت ... حبيت اجمعها واعرضها باختصار تحت عنوان متفرقات ...

اختباري الرابع

من يومين تقريبا كان عليا تقديم الاختبار الرابع في غضون اقل من شهر ... تقريبا صار الاشي عادي عندي ...
وزي كل مرة وبدون اي مبالاة توجهت للإختبار ... ربما ادعينا انه كان جامد شوي .. لكن طبعا اللي رايح علي ما عنده اكيد رح يقول هيك , أعتقد لو انه الموضوع اخذ بشكل من الجدية كانت ستكون النتيجة ممتازة ...لكن برضه نأمل مع رعاية من الله ولطفه ان تكون كذلك ...
ومهل عليا على بال ما اقتنع واصير اخد الموضوع بشوية جدية !!

نكسة جديدة

صحيح ... أقل ما يقال عنها انها نكسة ... ولكن اللي بخفف الصدمة انها نكسة متوقعة .. او بعنى اخر نهاية لمسلسل درامي طول كتير

بين الشرع والعرف والعادة

الشرع : تشريعات وقوانين فرضها الله عز وجل اما في كتابه الكريم او في سنة نبيه الحبيب عليه الصلاة والسلام او اجمع عليها العلماء .

العرف والعادة : افعال واعمال متداولة ومتعارف عليها في منطقة ما .

بين الشرع و ( العرف والعادة ) ... نقطة حوار كثيرا ما تناقشت بها مع اناس عدة ...

ففي الغالب ما اصبح الناس ينظرون الى العادة علي انها تشريعات يجب تطبيقها ...

في احدى نقاشاتي مع احد الأقارب كنت قد سالته عن ما اذا ذهب شخص الى المسجد وهو يرتدي ( شرط برمودا وبلوزة كت ) فما كان منه الا ان رمقني بنظرة حادة وصرخ ( نعم ) ..

الحب يفسد النسل

سلام الله عليكم ...
بعد كم من يوم من الضغط من جميع النواحي وشوية عدم تركيز ولخمة ... بديت استعيد شوية من صفاء الذهن ^_^ ... كنت قاعد مع نفسي هيك بتامل في هالدنيا خطر علي بالي هاد الفكرة السخيفة ... اجا علي بالي انه الحب بفسد النسل ...

كيف !!!

هادا محسوبكم العبقري قعد يتأمل في اجيال زمان وفي اجيال هالايام ... ويقارن بينهم ... كيف كانه يتزوجوا .. ايش المواصفات (( حلوة هادي مواصفات - بنتيوم 4 ^_^ )) اللي كانه يدوروا عليها

وجدت انه غالبا الجيزة كانت علي بركة الله ... وقليل ما تجد مكان لعلاقة قائمة ...

المهم علاقة الفكرة بالموضوع ... انه استشفيت انه زمان كان مثلا واحد قصير بدوا يتزوج يدوروله علي وحدة طويلة !! .. قال ليش عشان اولادهم ميطلعوش قصار^_^ ...

واحد اسمراني يدوله علي وحدة بيضا ... وهكذا

هالأيام الحب مخلاش لهيك مواصفات مجال ... فالقلب وما هوا ... عدش تفرق قصيرة .. طويلة ... المهم انها هيا من تملكت الاشي

وهالاشي ادى ورح يؤدي الي فساد في النسل (( مش عارف اذا المصطلح بليق ولا لا)) ...

مش عارف الظاهر كاين سرحااان كتير :D

فالاجيال كل ما بها لورا ... شوية ويصله الأرض ^_^ ...

وستكشف الهوية مع مرور الزمن ;)

طبيعة البشر

لم اكن يوما احبه .. لكنني ما كرهته يوما ايضا ... لم أعشق الاستماع له ربما لأنه غالبا ما خاطب العالم بالعربية الفصحى التي أكرهها ولا ادري لما ...
كنت غالبا ما أهزء بعشاقه منه .. واتخده كوسيلة للسخرية منهم ...

ومع مرور الايام وتقلبات الزمن ... تغيرت المعادلة فمن كنت لا أهواه منذ فترة ... أصبح الان هو من يروق لي ... ربما لن يغدو المميز بالنسبة لي ولكنه علي اي حال من الأحوال أصبح منمن يستحوذ علي جزء من اهتمام مسمعي ...
ولكن كيف لي الان ان اواجه عشاقة بهذه الحقيقة ... نعم , كيف لي ان اواجههم بحقيقة كانت يوما من الايام مدعاة للسخرية منهم ...
هكذا نحن البشر .. نصر علي مواقفنا حتي وان ادركنا يوما من الايام اننا كنا علي خطا ... نكتم اسرار في قلوبنا خوفا من سخرية غيرنا بنا .. نصر على مواقفنا حتي ولو تخلينا عن جزء من احلامنا.

هو مجرد مثل بسيط من حياتنا ... لن يغير الاعتراف بما جرا به شيئا لا للأسوء ولا للأفضل ... ومع ذلك نؤثر الكتمان .

كثيرا ما استغنينا عن احلامنا لأنه يعز علينا ان نغير من مواقفنا .. وربما يوما لصعوبة ان نبوح عنما بداخلنا ...

نعم .. تغيرت ملامحنا لنبدو أكبر ... ولكنا ما زلنا في نظر الزمن صغار ... يحلو له أرجحتنا كيف يشاء دون ادنى حراك منا .

تعـــب

باختصااار متعب جدا جدا جدا ... من جميع النواحي ...

يومي الأول

سلام الله عليكم ...

اليوم كان يومي الأول خلف مقود السيارة ... تجربة لأول مرة بخوضها ... ممتعة بس بتخوف :)

بس اطلعت في السيارة سألني المدرب ... عمرك سقت قبل هيك ...

طبعا كانت ايجابتي ... عمريش قعدت ورا الاستيرن ... في الأغلب كانت صدمة بالنسبة اله

بس اصلا هيا ليش اسمها مدرسة وانا ليش ريحله ... ماش عشان يعلمني :D

ولأني طالب جديد ... كان لازم استني المعلمين عبال ما يخلصه دروسهم ... لانه درسي الاول لازم يكونله طابع خاص ... فبعد لفلفة قاربت علي الساعتين في السيارة واحنا بنتفرج علي الناس كيف بتسوق ... انطلقنا علي طريق البحر علي اساس فاضي وخارج البلد ...

بديت اتعرف علي المراية والغماز ^_^ وانطلقت ...

بالتأكيد اي غلطة هيك ولا هيك بنروح احنا واللي معنا ... فالواحد كان خايف وهوا بسووق ... طرنا علي طريق البحر ... طبعا مع صعوبة السيطرة علي السيارة ...

كبداية بعتبرها كويسة ... وان شاء الله مع الزمن بنتعلم ^_^

والحمد لله ربنا ستر ... روحنا وهينا بندون

وربنا يجيب اللي فيه الخير

زهقاااااان

سلام الله عليكم ...

بصراحة اليوم ما كنت حابب ادون اي اشي ... بس وصلت معي لقمة الزهق ... وملقيتش غير افش غلي في التدوين ... 

مع اقتراب الشهر العاشر علي تخرجي .. كل يوم عن يوم بزيد مسلسل الزهق ... الايام بتمر بدون ادنى فائدة ... والحياة صارت عبارة عن روتين يومي مش أكتر ... بعد التخرج بفترة بسيطة واثناء فترة عملي ... كان الواحد مجبر علي تطوير نفسه لانه مكان عمله كان يفرض عليه يتابع كل جديد .. بس ما اكن في وقت ليوفق الواحد بين شغله وتطوير نفسه واهله واصحابه ... وكانت حجتنا هيا الوقت ... 

حاليا ... ما في شيئ ورانا ... ومن كتر ما الواحد فاضي مشغول ... بس ما في دافع لانه الواحد يبحث عن اي شيئ ... المخططات كتيرة والمطلوب كتير كمان .. بس ما بتم انجاز اشي ... ما فيه دوافع !! :: حجه واهية :: 

مع بداية اليوم ... وبمجرد ما بتبدا اشعة الشمس تسلل للأرض ... ببدا التخطيط لتضييع اليوم ... :: فعلا احسن مصطلح اطلقه هو تضييع :: لأنه المخطط يخلو من اي فائدة ... 

في الايام العادية بسلي وقتي بمدرسة القيادة ... علي الاقل حجة اهي الواحد بروح وبضيعله شوي وبشوف العالم ... مع اني مش مقتنع فيها لحتي الان ... لكن اهي بتسلينا هاليومين ... بتردد علي الجامعه من فترة لفترة بحجة متابعة جديد الشهادة ... وبهيك في الاغلب بكون قضيت علي الفترة الصباحية من اليوم ... 

وبعد العودة للبيت ... هاد اذا كان في عودة اصلا ... بتبدا حياتي اليومية ... بفتح الجهاز بنتت ... بسكره 5 دقايق وبرجع بفتحه ... كل ما بتخطر علي بالي فكرة استغلال للوقت وانا بنتت بقول ولإيش الواحد يتعلم ... مهيا الايام جاية ... لما ييجي وقت الشغل بنرجع نبحث ^_^

موضة جديدة ... سماعة الجوال في داني وبتنقل بين محطات الراديو .. ومن غرفة لغررفة ولما بزهق من الغرف بطلع علي السطح ^_^

المشكل وين ...

في يوم الجمعه ... ليش !!!

لانه في يوم الجمعه كل مؤسسات العالم بتكون اوف ... وبهيك برنامج المسا بتحول للصبح والمسا بندور علي برنامج ... حتي المباريات اللي بتبعها ... يوم الجمعه بيخلوا من اي قمة كروية ^_^ :: زي يوم الاتنين كمان .. عيد الحلاقين :: ... فما النا غير ندون :lol:

و ادينا بنطقطق في البيت ... علي الأقل اذا ما بنتعلم جديد بنحافظ علي اللي عنا ...

وعلي راي تامر حسني ... كل ما اقول هتغير تحصل حاجه ترجعني عن كل اللي انا ناويه

نوع من انواع فشة الخلق مش اكتر ...

والحمد لله علي كل حال ...

وربنا يجيب اللي فيه الخير ^_^

الغاز في غزة !!

سلام الله عليكم ...

كلكم بعرف الوضع اللي مر فيه قطاع غزة .. من حصار ونقص في الموارد الطبيعية ونقص في ادنى مقومات الحياة ...
الاغلاق والحصار اللي انفرض عليها حرم اهلها من اقل حقوقهم ... علاوة عن الادوية الضرورية لأصحاب الامراض المزمنة :: عافانا وعافاكم الله :: من الاشياء اللي انقطعت هوا غاز الطهي ... منما دفع الناس انها تبتكر اختراعات جديدة وتستخدم وسائل قديمة منها وحديثة ...
منها الحطب ومنها بابور الكاز ... اللي احنا في البيت استخدمناه ^_^ بالاضافة للطهي باستخدام الكهرباء

غير الاختراعات اللي ابتكرها شعبنا فالحاجة ام الاختراع ... تم تحويل انبوبة الغاز لتعمل بالكاز ... اللي كان متوفر عن طريق الانفاق ...

 

صورة لأنبوبة الغاز بعد تحويلها للعمل بالكاز

بابور مزعج



بابور أخرس ... الخلفي ب 6 فتايل والامامي ب 8 فتايل

وجميعها يعمل باستخدام الكاز ....
وزي ما بتوضح الصورة في بداية الموضوع ... انه الناس كانت تصطف بطوابير طويلة للحصول علي نص جرة غاز ... واستمرت هادي المعاناه ...
من فترة بسيطة بدأ الغاز يتدفق بكميات اكبر شوي للقطاع منما حسن وضع الغاز في البلد وبدت الامور ترجع زي زمان ...

اللي دفعني لكتابة الموضوع ... هو انه الطريقة القديمة اللي كنا بنعبي فيها غاز ... انه كان ييجي الراجل اللي بلم انابيب الغاز من البيوت ... ييجي لحد بيتك ياخد الانبوبة ويعبيها ويرجعهلك للبيت ... لكن مع الازمة وزي ما زكرت بعد طلووع روح ووقفة بالطابور ل 3 ساعات في محطة الغاز بتطلع بنص جرة فقط !!

لكن ... اليوم وفجأة اذا بصوت بخترق حواجز الصمت ... صوت انبوبة الغاز وبنقرع عليها ... وهوا الصوت الخاص بالرجال اللي بعبي غاز حيث يسسر في الشارع وبطقطق علي انبوبة فارغة ... طبعا في بداية الامر ما صدقنا لحد ما فتحنا باب البيت وتأكدنا وشفناه بعينا ... فشكلها بدت تنفرج ... ان شاء الله ربنا يفرجها علي هالشعب المنيل ... ونرجع ولو لربع اللي كنا فيه قبل ... مع انه اليوم اللي بروح ما برجع ....

ربنا يجيب اللي فيه الخير ^_^

الحمد لله ... هيييييه

سلام الله عليكم ...

زي ما زكرت في موضوع سابق انه حجزت امتحان اشارات اليوم ... وفعلا اليوم توجهت للمرور عشان اقدم الامتحان ...

بكل صراحة كنت خايف من الامتحان ... رغم انه امتحان اشارات وقدمت امتحانات كتير اصعب واهم من هيك بس كنت خايف لانه في الفترة الاخيرة الامتحانات اخدت جانب اخر عندي ... كان الامتحان رغم انه ملوش دعوة باشي الا انه كنت متخذه كخطوة من استعادة الثقة ...

الحمد لله ... كان الامتحان بسيط واستمر الخوف الا ان وصلت النتيجة ... والحمد لله عدينا الامتحان ... وان شاء الله بكون خطوة لاستعادة ثقة كادت ان تفقد ...

ربنا يجيب اللي فيه الخير ^_^

وأخيرا ...

وأخيرا ... وبعد عناء كبير... وقصص و روايات ألف ليلة وليلة تم الإعتماد ...
هيييييييييييييه

هناااك ...

اليوم كنت هنااك ... هنااك حيث يروق لي المكان ...

المكان هاد تقريبا هو اكتر الاماكن اللي بحب اتوجهلها ... بعجبني البحر بكبره ... قد ما تحاول تشوف اخره مش رح تقدر ... بصفاءه بجمال منظره ... يمكن بحرنا مقرف صحيح بس بالنهاية هوا بحر ...

غدار صحيح مش كذب ... لكن هوا المكان الوحيد اللي بتقدر تدفن فيه اسرارك ... بتكون واثق انه مش رح يبوح فيها رغم انه غدااار !!!

بحب لما اكون مضايق الجأ لهاد المكان ... ما بغير من طبيعة المشكلة ولا بتلاقي الحل هناك ... بس علي الاقل بتفش خلقك وانتا تتامل فيه...
بس بدون ما يكون في هسهس ... والا هتروح تحكحك :D ...

بحرنا حلو ^_^

Still Waiting

and .. i'll still waiting for something !!

ليس كمثله من الأيام

سلام الله عليكم ...
اليوم كان يوم غريب شوي ... مش عارف حسيته مختلف شوي ... وصراحة مفيش اشي ادونه بس لانها يوميات رح حاول دونلي شوي ...

في الغالب مبقعدش بالبيت طول اليوم ... اليوم صارت الساعة كتير وانا مرمي بالبيت وما طلعت ... مش بعرف ليش بس خلص هيك ... مفترقات كتير اليوم في الحياة وقفت عليها ... وفي النهاية الحل انه تبقي مكانك ... ومع اقتراب نهاية اليوم فكرة قديمة جديدة رجعت تنطرح من جديد .. لتنضاف لمفترقات الحياة ... ولسا مش معروف ايش يصير فيها ...

اخر اليوم لفلفتلي شوي في هالشوارع ... وبرضه وقفت علي مفترقات ... بس هادي المرة مفترقات طرق ... وقفت علي اكتر من مفترق وتردد كتير ..يمين ولا شمال ...

في النهاية هوا يوم وشوي ويعدي ...

والله يستر من الخطوة التالية الي رح تكوون ...

ربنا يجيب اللي فيه الخير ^_^

اشارات ^_^

من تقريبا كتير التحقت بمدرسة تعليم قيادة سيارات ... كان هاد الكلام بعد تخرجي من الجامعة وكخطوة من ملئ الفراغ ايضا التحقت بمدرسة الكفاح ...

اجريت الفحوصات اللازمة تقريبا مع بداية اغسطس 2008 وبدات في دراسة اشارات السير وقوانينها وهلم جرة :: علي راي هالواحد :: وعند اقترابي من نهاية دراستها والاقتراب من موعد الاختبار ... اجتني وظيفة وتركت المدرسة ولجأت لعملي ومكنش وقت العمل يسعفني اني اكمل مسيرتي مع الرخصة :: زي الصحيح يعني ::

ومرت الايام ... ورجعنا زي زمان ... مشغول من كتر ما انا فاضي ... قررت العودة للمدرسة وطبعا درست من اول وجديد لانه 7 شهور كانت كفيلة باني انسي كل شيئ درسته ...

وبعد مرور 3 اسابيع ... نصهم تشليط يعني كنت بروح يوم و ابصر اكم مروحش ... انتهيت وللمرة التانية من دراستهم وقررت او قرر لي اني اقدم الامتحان يوم الخميس 16-4 ... وللعلم هاد ان شاء الله رح يكون الاختبار رقم 3 الي في هاد الشهر ... والله اعلم ان هيكون الاخير او هيكون لأ

أأمل من الله انه يكون افضل منما سبقه ...

وربنا يجيب الي فيه الخير

اليوم السابع

اليوم بصادف اول جمعة الي في المدونة ... واكيد يوم الجمعة بكونله طابع خاص عن باقي الايام ... وفي ناس بتعتبره يوم مميز يمكن لتجمع العائلة في هاليوم او الله اعلم ليش

بالنسبة الي هو اليوم اللي بكمل ال 7 ايام بالاسبوع ... بطبيعتي ما بحب يوم الجمعه كتير .. هوا مش يومي المفضل ممكن لانه في زمن قريب كان هوا اليوم اللي الكل بكون في البيت فيه وبتحس البيت لخمه هيك ... بس حاليا معدتش تفرق فالبيت في معظم ايامه اهله موجودة فيه مهو الكل قاعد في هالبلد .

في النهاية اهو يوم وبده يعدي ...

وبما انه جبنا سيرة الجمعة ... رح اطرق لخطبة الجمعة
في الماضي كنا نروح الجامع لنسمع موعظة دينية او قصة ناخد منها العبرة ... ومن جمعه لجمعة علي الاقل نستمع لبعض النفحات الايمانية في الخطبة ... ونستذكر حاجات نسيناها ...
بس الاكيد انه وضع بلدنا واللي صار في الفترة الاخيرة ما ترك اشي ما أثر عليه ... ومساجد البلد جزء من البلد فكان للوضع الحالي تأثير علي الخطبة ...
صرنا نروح علي الجامع لنسمع خطاب سياسي ... او قصة من السلف الصالح بس هالمرة مش لأخد العبرة بل لفرض وجه شبه بين السلف والخلف ...

ومعيي بلاش نبلش نخبص ...

ربنا يصلح الحال ...

ماراتون الأزهر

السلام عليكم ...

زي ما قلت امبارح انه كان في امتحان توظيف لالنا اليوم بالازهر ... توجهت للإمتحان بعد مراجعة بسيطة جدا لشوية شغلات لاني مقتنع انه كل الشغلة رفع عتب مش اكتر ...

الامتحان كان جزئين عملي ونظري ...

العملي كان بسيط ولكن الوقت ما بسعف تاخد راحتك بالحل ... مش بلوم الوقت لكن برضوا الواحد زمان ما اشتغل وورد واكسل ... :: وورد واكسل عادي متستغربوش ::

وطلعنا من العملي علي اساس النظري رح يكون اسهل .. ولكن العملي طلع سباق 100 متر والنظري هوا المارتون ... اسئلة منوعة ومعددة ... غدونا شوربة خضار يعني ...

كان الامتحان يصنف من الامتحانات الرياضية ... اللي بتمارس فيها رياضة الجري لحد ما ينقطع نفسك ... جريت جريت وبعد نص الطريق بشوي بنشر العجل ...

واهي تجربة بتنضاف علي التجارب السابقة ...

مخسرناش اشي ... غير 5 شيكل مواصلات :D

رفع عتب

اليوم نزل اعلان عن وظيفة كنت اتقدمتلها في جامعة الازهر ... الوظيفة مش معروف راسها من رجليها ... بس كرفع عتب لازم نرمي طلب وين ما اجا ...

الاعلان بقول انه بكرا في امتحان عملي وبعديه امتحان نظري ... والاشاعات اللي سمعناها انه الوظيفة مفصلة لشخص معين بتحبط الواحد وبتخليه ما يفكر يراجع اشي ... خصوصا انه معالم هالوظيفة مبهمة ومش معروف هوا المطلوب ايش بده يكون ...

كخطوة اخري من رفعات العتب الكتار رح اراجعلي شوي انا وصديق الي ...

وربنا يجيب اللي فيه الخير ... مع اني مش متفائل خصوصا بعد اللي حصل في المقابلة اللي فاتت.


رفع عتب ^_^

حيثيات كانت مفقودة

امر غريب صار معيي امبارح ... شيئ كنت من فترة حابب اعمله ... وكنت متردد ... امبارح حاولت وتقريبا كل شيئ رجع مثل ما كان ...

ما تم السيطرة علي الوضع ... بس الوضع افضل من اول ...

المشكلة اني مش عارف ايش نهاية المطاف .. خايف ناس تنظلم معي ... وبنفس الوقت خايف اكون بظلم نفسي ...

وربنا يجيب اللي فيه الخير ...

والمكتوب على الهارد لازم يشوفه الجهاز ...

^_^

ليش اليوم ... مش عارف

اليوم لقيت حالي فاضي ... عاد علي اساس في الايام اللي فاتت كنت مشغوول ...

المهم قررت افتتح مدونتي ... يوميات فاضي ... لسا ايش المواضيع اللي رح تنعرض هان مش عارف ... ايش هدف المدونة برضه مش عارف ... يمكن لاسلي وقتي ...

رح احاول بهالمكان ابووح بالاشي اللي مش قادر ابوح فيه قدام الاشخاص ... مع اني عارف اني برضه في هالمكان هاد مش رح كون قادر اكون صريح مع نفسي ... ما بعرف ليش بتراودني مخاوف اكتب عن اللي في قلبي ...

يمكن لانه لساني عجز عن النطق لخوفه من السامعين ... والخوف انتقل لايدي لخوفه من الشايفيين ...

لما الاقي موضوع برجع ...

علي العموم اهلا وسهلا فيكم ... يعني مبدئيا برحب بحالي قاعد ^_^